Compass doganbaruh

Aktualidades

Kero empesar mi artikolo en dandovos una negra novedad. El Sinyor Selim Amado, ermano grande de la kerida Rachel Amado Bortnick mos desho la buena vida la semana pasada. El Sinyor Selim reelmente era un ombre de alta valor i aparte de su echo (el era farmasyero-eczacı) lavoro muncho por la sosyeta turkana ke bive en Israel. Lo mas emportante es ke tenia un nivel alto entelektual i puediya eskrivir fasilmente en turko i en judeo-espanyol. Kreo ke eskrivia bastante i en ebreo! (komo no konosko el ebreo no se lo ke eskrivia). Mizmo kuando siertas personas eskriviyan kon una grande reaksyon el sinyor Amado era kapache de tratar el sujeto kon sangre fria (soğukkanlılıkla). Selim era un savio. Avlava o eskrivia lo ke se devia de avlar o de eskrivir.

Tuve la posibilidad de renkontrar munchas vezes al Sinyor Amado i munchas vezes tuvimos la posibilidad de partajar siertas ideas en el internet. Dospues del internet reelmente fue muy kolay de partajar muestras ideas.

Vos kero avlar de dos diferentes aktividades kulturales ke tuvo lugar i ke se va realizar.

Era tres kuatro mezes antes i komo Karen no estava en Estanbol tuve la posibilidad de ser envitado por una persona ke estava azyendo un filmo sovre las linguas ke estan en olvido en muestro pais. I ay un alay de linguas asemejantes. No va ser muy kolay de deskrivirlas en judeo-espanyol. Las linguas de los Suryanis, Keldanis, de los Lazes , de los Gagavuzes, de los Zazas i de los Abazas, de los Hemshines i de los Cherkezes, de los Romanos (zinganos) i de los Djudios Sefaradis … I este filmo se estava realizando para el Ministerio de la Kultura. I ayer avia la avyertura de este filmo kon un konsyerto. I a este diya se dyo el nombre de “Kaybolan sesler, unutulan diller / Las bozes (kantikas) desparesidas, las linguas olvidadas. Malorozamente no tuve la posibilidad de partisipar ma kero ver el filmo aparejado…

La otra aktividad kultural va ser realizada a la fin de este mez el 27, 28 i 29 avril en la Universitad Bilgi (Santralistanbul). I esta aktividad va tener el nombre de “La fiesta de las Kulturas d’Estanbol” No se si van aver bastantes partisipantes? Ma puedemos partisipar a esta aktivitad kon un konserto del grupo Nes, kon un filmo ke puede ser un poko en las linguas diferentes, puedemos prezentar siertos CDs i siertos livros en judeo-espanyol.

Oy en diya es enteresante ke no solo en muestra komunidad i en muestro sentro, ma mizmo en muesto pais se estan realizando siertas aktividades kulturales ande puedemos propajar (yaymak) muestra lingua.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın