Compass doganbaruh

Pesah i el empesijo del enverano

Este anyo selebrimos la fiesta de Pesah mas presto ke kada anyo i todas las festividades i komemorasyones de la primavera van a ser fiestadas mas presto ke kada anyo. A la fin, las demanyanas mos estamos espertando dospues kel diya amaneska. ı este modo tengo la posibilidad de kaminar una media ora en la kaye porke en invyerno reelmente era una desgrasya de espertarse i kaminar en la demanyana! Reelmente no era posivle. 

Los elevos ke deven de estar a las syete i media en las eskolas ke son a ventisinko o trenta kilometros de las kazas, vyenen a bushkarlos a las sesh i media, a la media noche. Komo me konta mi ijo es defendido de avlar en la araba porke todos durmen en este kamino de kuarenta i sinko puntos. Mizmo kuando yegan a la skola es la mizma koza, todos durmen esta vez en la klasa i si ay uno ke tyene el koraje de asender la luz deve de fuyirse de la klasa para no ser despedasado.

Kada anyo dospues del Dia del Judeo-Espanyol/Ladino, tenemos muevos projektos. Esta vez fue el “Whatsapp Grupo Judeo-Espanyol” ke fue un projekto realizado por Karen Şarhon, Henri Çiprut i Emel Benbasat ke lavoraron bastante para su realizasyon. Kada diya tenemos un byervo kon su eksplikasyon en turko, inglez i espanyol moderno. Reelmente fue un projekto ke atiro la atension de 300 mansevos. I el buto era esto. Devemos de azer dainda munchos projektos para developar el ensenyamyento del Judeo-Espanyol a los mansevos. La futura jenerasyon va ser el futuro de muestra lingua. Kada semana esto eskrivyendo unas kuantas kozas sovre este sujeto para mensyonar la emportansa de esta idea.

El 13 del mez de mayo vamos organizar por la tresera vez en Edirne un konsyerto i una ekspozisyon. El konsyerto va ser dado por un artisto de violon, Roby Lakatos, orijinaryo de la Ungarya kon el famozo  artisto turko, Serkan Çağrı ke reelmente es un maestro sovre el enstrumento de klarinet. Es un echo de lokos ma azemos todo modo de esforsos para pueder kontinuar estas aktividades kulturales en esta sivdad.

El sujeto de la ekspozisyon es “La Mujer” - “La Mujer en Andirne” i la ekspozisyon kontyene todo modo de mujeres: turkas, djudias, gregas, ermenis, bulgaras, romanas… Puedeser ke no fuimos sufizientes para pueder topar siertas dammas italyanas ke fueron renomadas en Andirne o dospues mizmo en la Italia. Fue un echo de loko ke se realizo en poko tyempo. Devemos de rengrasyar a la sinyora Dalia Maya ke izo todo modo de esforsos para realizar esta ekspozisyon. Va ser un grande plazer de envitarvos a esta aktividad ke va tener un pranso antes del konsyerto. Vash a topar mas munchos detalyos la semana venidera…

 

———————————

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın