El Djudeo-Espanyol i los Argentinos

Silvyo OVADYA Köşe Yazısı
28 Mart 2018 Çarşamba

Kada semana esto azyendo un esforso para pueder eskrivir uno o dos artikolos en Judeo-Espanyol, en djudezmo, en la lingua de mis avuelos. Era noche de shabat, un grupo de Djudios ke vinyeron de Buenos Aires, de Argentina, estavan envitados al seder de Shabat en el Or-Yom ke es muestro Sentro por las personas aedadas. I tuvimos la posibilidad de partajar muestra komida kon los pansyoneres del sentro i muestros envitados ke venian de la Argentina. Estavan envitados por el Ministeryo de Echos Estranjeros para darles siertas enformasyones. El anyo pasado avian organizado una konferensya sovre el problem de los Ermenis ke se bivyo en los anyos 1915 en las tierras Turkas. I para pueder dar siertas eksplikasyones fueron envitados a Turkiya …

  En esta noche de Shabat para mi lo mas enteresante era de pueder konoser un poko la komunidad Djudia de Argentina ke reelmente es una Komunidad Djudia muy emportante ke poseda mas de 280.000 almas i pueder avlar en Djudesmo para pueder komunikar kon muestros korelijionaryos. Ya se ke no es egzaktamente la mizma koza. Lo ke avlan i lo ke avlamos son kozas diferentes ma no es muy yuch de pueder entender lo ke se esta avlando. En esta noche tuve mizmo el plazer de avlar al publiko para dar enformasyones sovre muestra komunidad. Dospues de komer un jurnalisto ke estava viyajando kon eyos mos demando komo bivimos en este payis? Keriya eksplikasyones sovre el modo de vida de la Turkiya i de la Komunidad Djudia. Tomi la palavra para pueder eksplikar esto todo en la lingua ke esto eskrivyendo. Reelmente para los ke viyajan, muestro payis no es muy kolay de entender ke modo de payis es? Puedej ver personas modernas/nos i siertas personas ke tyenen syertas vistimyentas ke se visten las personas relijiozas. Ay restoranes i klobes muy modernos i de la otra parte puedesh topar siertos lokales muy modernos ande no se vende alkol. Reelmente bivimos en un payis ande se topa de todo.

 Mos estan demandando si semos orozos. El primer punto es la parnasa. Si sosh kapache de ganar vuestra vida a lo manko no tenesh problemes materyales. Ma esto no es todo! I devesh de ser liberos en vuestras ideas i en vuestros movimyentos. Tenemos toda muestra libertad para pratikar muestra fey (inanç).

 Esta noche ize un chiko yerro: no pensi ke deviya de darles un CD de los tangos en Djudezmo …

 Al lugar de darles un CD, este anyo kon mi mujer estamos felisitando la fyesta de Pesah de muestros amigos i paryentes en ofresiendoles un CD de los Tangos Sefaradis de Los Pasharos Sefaradis.