Un fin de semana en Rize

Un fin de semana en Rize

La semana pasada me fui kon mi ijo i mi ermuera a Rize para pasar dos dias leshos del stres i del ruido de Estambol, para tener un poko de repozo, kalmo i kayades.

La madre i el padre de mi ermuera mos arisivyeron en Trabzon ande abashimos del avion i mos fuimos a komer en un restorante famozo de karne en “Akçaabat.”

Komo ya estavamos kansos del dia entero de echo, a las onze mos fuimos al otel en Rize para repozarmos i echarmos.

Shabat demanyana salimos del otel a las dyes de la demanyana para ir a azer el dezayuno en “Çamlıhemşin”en un kafe partikular de la mar preta “Karadeniz” kon sus spesyalidades muy savrozas.

“Çamlıhemşin” es un distrikto (ilçe) de Rize entre los arvoles de pinos en el pye de la montanya de “Kaçkar” ke kon su natura i aver esta maraviyando las personas ke estan vijitando aki. En este distrikto ay munchos pontes naturales, kaskadas (şelale) maraviyozas, platos (yayla) altas, aguas ke estan koryendo de las montanyas i otras maraviyas de la natura.

 Despues del dezayuno mos fuimos a “Zilkale” ke se topa entre las montanyas a 750 metros de altura de la mar i a 100 metros de altura del rio de “Fırtına Deresi” ke esta koryendo debasho de esta torre ke se konstruizo en el 14 en syeklo enriva de un pinyasko (kaya) i kon su vista majestuoza se esta vyendo de muy leshos. “Zilkale” tyene una emportansa istorika i es un lugar turistiko porke tyene una vista natural maraviyoza.

 Salyendo de “Zilkale” por un kaminiko un poko perikolozo ke una parte es un abizmo (uçurum), arrivimos a la kaskada (şelale) “Palovit” ke se topa aryento de una shara (orman) abondante (gür) i es una ermozura natural de la Turkiya.

Se puede dizir ke es komo una kuvyerta blanka en la kama entre las mil kolores vedres. Es un lugar fantastiko ke kale vijitar absolutamente.

A la fin vinimos a “Ayder”, ke es el lugar de repozo de banyos termales (kaplıca) en un aver muy limpyo. La agua de los banyos termales esta vinyendo de 250 metros del fondo ke tyene una kayentor de 50 grado i es una agua muy saludoza (şifalı). Esta kurando las hazinuras romatizmales, las egzemas, las hazinuras de dijestyon, de sirkülasyon, de korason i los problemes dermatolojikos.

El otel se topava en “Çayeli” ke es un distrikto de Rize. El sigundo dia kaminimos Çayeli ke es famozo kon el te, i arrivimos a la kaskada “Ağaran” ke nase de las montanyas i las aguas ke koryen, kuando se rankontran kon los pinyaskos duros (sert kayalar), u kon abismos (uçurum) forman las kaskadas. La kaskada “Ağaran” se ve de muy leshos porke korye kon grande fuersa de tres kuatro lugares diferentes en echando al entorno eskumas (köpük) blankas.

Tyene una vista estetika i es de una ermozura rara de muestro pais.

Midi arrivimos a Trabzon despues de kaji kuarenta puntos de Rize.

Un restorante famozo, tipiko de la mar preta. Komimos i bevimos i al Dyo Baruhu bendishimos, ke mos dyo pan para komer, agua para bever, panyos para vistir i salud buena para kaminar i vijitar lugares muevos.

 “Trabzon” es la perla de “Karadeniz”. Ay lugares diferentes de vijitar ma no teniyamos muncho tyempo i mos fuimos solamente a “Boztepe” ke tyene un panorama, una vista de la sivdad maraviyoza, ande se puede ver el nasimyento del sol.

Enfin ya vino la ora del avion i despues de un viaje repozado arrivimos a Estambol, a muestras kazas sanos i rezyos.

El Dyo ke mos guadre de las kozas ke no mos puedemos guadrar, Amen ve Amen…

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın