Kualo estash asperando para embiyar 70 liras al kuento del Sentro Sefaradi para pasar un diya entero en Ulus, en la eskola Djudia. Pensando los yerros ke izimos el anyo pasado, avlimos kon el otopark ke se topa entre la eskola i el Akmerkez ensima la djadde para un mijor presyo. I metimos un servisyo ke va azer “la navette” komo dizen los fransezes entre el otopark i la eskola.
No vos plazyo un diya sefaradi sin komida. Esta vez lo izimos kon komida. Mizmo kon komida sefaradi. Mizmo kasher. I kreo ke vos va plazer lo ke vos vamos a ofreser. El anyo pasado no topatesh las “Borekas”! Este anyo las vash a topar. Los mansevos disheron ke el Diya del Ladino no esta “Kara riyente”. Organizaremos unos kuantos djugos ande todos van a pueder partisipar. I a lo manko mos vamos a riir. Es djusto dishimos. I ayde los mansevos kale empesar a lavorar…
Este anyo Izzet Bana, kreo ke solo kon las dammas formo el Koro Nes (de muevo) i mos van a kantar kantikas en muestra lingua: en Djudeo-Espanyol.
No se si la konosesh. Zelda Ovadia va vinir de Israel para avlarmos sovre los refranes.
Reelmente vos konsejo de partisipar a este diya ke va ser kreo “Una Maraviya”. Este anyo yo no va avlar sovre las eskrituras ke se topan en las tombas!
Aze un telefon a Emel Benbasat (0212 2938794/ext 158) u a Karen Şarhon (0542 4258176) para merkar vuestros bilyetos. Al vermos en muy serka!
