Un Teatro, Una Mitsva

Karen GERSON ŞARHON Judeo-Espanyol
20 Aralık 2017 Çarşamba

En la vida de una persona no viene munchas oportunidades para azer grandes mitsvas. Ma kuando ya mos viene una de estas oportunidades, kale akapararla i no desharla de la mano.

Kuando Jojo Eskenazi mos disho ke ivamos a djugar KULA ‘930, la piesa de teatro ke aviyamos djugado antes 40 anyos por la primera vez para una mitsva grande de azer meldar la universidad a ijikos, todo el ekipo disho “Si”. En el mez de Oktubre, mos metimos a lavorar. I komo de lavoro! Un ekipo de 40 adultos + 18 kreaturas no es fasil de organizar i azerlos aktuar. El direktor de la piesa es Ferit Koen, un mansevo kon muncho talento ke pudo, kon la grande pasensia ke tiene dirijir a toda esta djente (todos entre 50 i 60 anyos kon la eksepsion de unos kuantos mansevos komo Cenk Rofe, Buket Bahar i Sibel Eskenazi ke tienen komo 40 anyos). Tuvimos bastantes aksilikes kon la salud de la djente, operasiones, kayidas, roturas ets ets ama no peryimos muestro moral ni el dezeo de azer esta mitsva. I este fin de semana, el 16 de Disiembre i el 17 de Disiembre djugimos la piesa 3 vezes a kaji 2000 espektadores. Esta es una piesa ke a lo largo de los anyos se djugo mas de 200 vezes en Estambul, Izmir i Israel. Kada vez kon salones yenos de djentorya i esta vez no fue diferente. Vimos ke esta piesa se izo un klasiko ke no se puede olvidar kolay kolay. A mi, lo ke me plazyo muncho fue la djente entendio i se rio en kada koza umoristika ke se estava diziendo. Kijo dizir ke mizmo si dizen ke no entienden el Judeo-Espanyol, esto no es verdad. Muy bueno entendieron todo lo ke se estava diziendo i espesialmente se pisharon de la riza kuando Jojo Eskenazi salyo a la shena kon el karakter de Moiz. Espero ke el video ke va salir va pueder mostrar todo lo ke se izo en la shena. El dekor i las luzes fueron echos por prefesionales i la vista estava una maraviya. De verdad, komo un muzikal de Broadway. El budjeto no permetio a alkilar bastantes mikrofonos i por esto los ke se asentaron en los dalkavos rangos no pudieron oyir muy bueno. El salon es immenso i la shena a lo manko el dopyo a lo ke estamos auzados, por esto estuvimos koryendo de un lado de la shena a la otra i Alhad la noche, kuando ya se eskapo todo, estavamos todos muertos de kanserya, kon dolores en el puerpo entero ama kon la grande kontentes de aver reushido en una koza para la kual lavorimos kon munchos sakrifisyos personales. KULA ‘930 se izo su lugar en los korasones de la komunidad djudia de Turkiya i se va akodrar siempre komo la piesa la mas reushida ke se izo.