Una semana yena de aktividades

Silvyo OVADYA Köşe Yazısı
20 Aralık 2017 Çarşamba

 

La semana pasada pasimos muestro tyempo en diferentes aktivitades. Un dia fyestimos los setenta anyos del Şalom, un otro dia aviya un konserto en un lugar muy popular i noche de alhad (cumartesi akşamı) fuimos a ver la piyesa de teatro, “Kula 930” ke fue djugada por los mizmos artistos ke estavan kuarenta anyos antes en la mizma piyesa de teatro. Esto no era una piyesa de teatro, era un muzikal porke la mas grande partida de los artistos mos kantaron todo modo de kantikas en Judeo-Espanyol. Reelmente fue una maraviya de ver este muzikal.

La primera noche avia solo dos problemes. El primer era ke la boz no se estava sintiendo bastante en los fotolyos de los rangos de detras. I malorozamente no aviya una senkronizasyon entre lo ke se estava avlando i lo ke estava eskrito en los subtitolos. Esto reelmente no entendi de ke no izyeron esta senkronizasyon. No estava aya ma disheron ke la sigunda noche la boz estava sufisyente. El dekor de la pyesa estava reelmente una maraviya. La muzika estava dirijada por la muzisyana Ceyda Pirali ke realizo el dalkavo CD de Los Pasharos Sefaradis, “Tangos Sefaradis del Dip del Baul”. No me esto akodrando egzaktamente la piyesa ke fue djugada 40 i 30 anyos antes. Ma las Estreyikas d’Estanbol tomo un rolo muy atraktivo. Las kreaturas kon sus vistimyentas i kon sus djugos estavan muy simpatikas. Moiz-Jojo Eskenazi; Bulisa-Karen Şarhon; Oro–Suzi Eskenazi; Mordehay-Viktor Nasi; El Rabino-İzzet Bana; Mlle. Behar-Forti Barokas; balukchi-Bensi Elmas; Mando-Beno Levi; Sami-Yusuf Adoni; David-Moris Levi; Suzan-Eti Siliki; Sarı Madam-Rebi Levi; zarzavatchi-Erol Eskenazi; Klara-Jinet Zalma; Doktor-Cako Taragano; Camila-Sibel Eskenazi; bumuelodju-Natan Siliki; Alegre-Anet Bonfil; Momo Eskenazi i Jak Anjel kon los kantadores/artistos Buket Bahar i Cenk Rofe kon la kontribusyon de los naradores (Anlatıcı) Yusuf Şarhon i Lili Duenyas.

 Kreo ke esta pyesa va ser la dalkavo en esta lingua porke no va ser muy kolay de topar mas de vente/vente i sinko personas ke puedan avlar esta lingua en la shena. Kero rengrasyar a todas estas personas por sus esforsos i los dirijentes de muestra komunidad ke tomaron este koraje envitando serka de dos mil personas kon la organizasyon del sinyor Cako Uyar ke es reelmente un organizatör eksepsyonel. En el grupo de muzika se topava gitara-Alper D.Aziz, perkusyon-Avi Banas, akordeon-Eli Meriç; piano-Ceki Granti; fluta-Gila Granti, kanun-Günay Çelik i bas gitara-Rasim Üretmen. Devemos de rengrasyar a estos muzisyenes por sus esforsos. Demandi al Şalom ke tomen en filmo este evenimyento. I lo izyeron. No es una koza ke se puede ganar paras. Ma se devia de azer porke reelmente esto fue un akto ke no se puede realizar otra vez muy kolay.

Esta semana el otro evenimyento emportante era la fyesta de los setenta anyos del Şalom. Vos va kontar esto la semana ke viene.