Yo era el kapo de la redaksyon del Şalom kuando alkanso sus 50 anyos. Organizimos un diya i estavamos muy kontentes de muestros sinkuenta anyos. (1997). Un anyo despues fue el sinyor Yakup Barokas ke se enkargo este posto i reusheron kon la kontribusyon de todos los ke lavoran para este semanaryo a fiestar los 60 anyos del Şalom en el Otel Ramada. Me akodro mizmo ke publikaron un livro - almanak para esta okazyon.
La semana pasada tuvimos siertas reunyones para dar karar lo ke puedemos azer por los 70 anyos del Şalom. İvo Molinas ke okupa el posto de kapo de la redaksyon mos yamo para partajar sus ideas i para partajar este kargo, porke despues de setenta anyos, no puediyamos azer una festividad muy medyokre. El 14 del mez de desembre en el Sentro de Arte Fulya ke es un salon de la munisipalidad de Beşiktaş, vamos a organizar una aktividad ke kontiyene tres partes. En primero vamos a ver un filmo sovre el Şalom i vamos oyir siertos diskorsos. Despues vamos oyir el jornalisto Ertuğrul Özkök ke mos va avlar sovre el jornalizmo de oy i va dar sus ideas sovre siertos evenimyentos i siertos konseptos.
El Şalom esta organizando una ekspozisyon de tablos i de fotografias ande las ovras van a ser realizadas por pintores/ras i artistos de fotografia, la mas grande parte miembros de muestra kolektividad. I entre la konferensya i el konserto de un famozo kantador djudyo de Fransia, vamos a tener el plazer de observar estas ovras. I keremos vender estas ovras para rengrasyar los artistos/tas. Kreo ke vamos a tener mizmo 2 ovras de un pintor muy konosido.
Ken va pueder vinir a esta nochada? Kero ke van a envitar un alay de djente i los ke lavoran por el Şalom i los ke sirven muestra komunidad ma kreo ke vamos a tener la posibilidad de vender a lo manko tresyentos lugares. I kreo ke el presyo va ser mas barato ke el Anfiteatro Avyerto ande aviya el konserto de este famozo kantador tres semanas antes.
I kreo ke vamos a publikar una seria de timbros postal para esta okazyon.
La Komida/kozina Sefaradi
en la Munisipalidad de fiiflli
Şişli, ke es uno de los mas frekuentado kuartieres de Estanbol por los djudios, en la munisipalidad tyene una konsejera (danışman) djudia, la Sinyora Nevin Zonana. Me bushko para demandar si puediyamos organizar un kurso de komidas Sefaradis en un sentro sosyal de la Munisipalidad de Şişli. Mi repuesta fue “Si” immediatamente, i enbiyi un whatsapp al grupo Sentro Sefardi i siertas estavan enteresadas a dar este kurso. Despues de unas kuantas reunyones (toplantı), dimos karar ke kada jugeves, entre las doz i las kuatro despues de midi, las sinyoras Dora Treves, Feride Petilon i İda Benromano van a dar este kurso. Para los enteresados pueden topar mas muncho detalyos en el internet, en el sitio de la Munisipalidad de Şişli.
La primera semana van a prezentar: Borekitas de berendjena, boyikos de kezo (kasher) i semola (irmik muhallebisi).
La segunda semana vamos a konoser: Kashkarikas, almodrote de kalavasa i boyikos de pimyenta.
Los kursos van a empesar jugeves, el 26 Oktobre.
