El Kriyador kriyo todo el mundo, los syelos i la tyerra, i todo lo ke ay en eyos en 6 diyas.
En el diya sejeno, kriyo al ombre Adam Arishon i a su mujer Hava. I los metyo dyentro la guerta ke kriyo en el oryente, Ganeden, para ke lavoraran i la guadraran de no deshar entrar adyentro a las bestyas i animales.
El Dyo permetyo a Adam i su mujer de komer de todos los arvoles de fruto ke aviya en Ganeden, afuera del arvol nombrado ‘ETS ADAAT’, arvol de saver, ke komyendo de su fruto aze pujar los dezeos i visyos del kuerpo. Le defendyo de komer de el.
Hava, la mujer de Adam, se sombayo detras de la vista ermoza de este arvol, i komyo de su fruta, i izo komer de el i a su marido.
El Dyo se aravyo muncho kon eyos por ke pasaron su komando i los maldisho, i los desterro de Ganeden.
El Kriyador les izo azer a Adam i a su mujer unas kamizas de kuero porke se toparan sus kuerpos ke estavan desnudos. A Adam le paryo su mujer dos ijos Kayin i Evel. I kon kada uno de eyos paryo una ija. La ke nasyo kon Kayin se nombrava Kalamana i fue mujer de Kayin. I la ke nasyo kon Evel se nombrava Balvera i fue su mujer. Kayin se okupava del lavoro de la tyerra, arar i sembrar. I Evel se okupava de pasear las ovejas.
Kayin i Evel trusheron prezentes a El Dyo. Kayin trusho de los frutos de la tyerra de lo ke vino a la mano. I Evel trusho de los primeros nasidos i los mas ermozos de sus ovejas.
El Dyo amostro su kontentes de Evel i de su prezente, i de Kayin i de su prezente no estuvo kontente.
Kayin se selo muncho sovre esto i le guadro mal kerensya a su ermano.
