Muy grande pena me izo la piedrita de la kerida amiga, Klara Perahya. Kada martes ke vinia al Şalom, para kontrolar la pajina de judeo-espanyol, siempre kon kara de riza, mos ambezavamos de eya sus ideas, su umor, su mirada a la vida. En vezes mos topavamos en un kafiko; kon su kerida amiga Mme. Franko. Afilu ke eyas eran dammas mas ayedadas de mozos, yo i mi amiga, Gila Erbeş mos plazia de tomar la enerjia de bivir, las saviduras de eyas. Me plazia ir a su kaza, komo un muzeo, para mi era la mas elegante damma del mundo.
Eya es ke me enkorajo de eskrivir en Ladino. Esto eskrivyendo i me esto ambezando mas muncho. Esto tomando muncha savor de la lingua; en mi chikes avlavan solo mi madre kon mi grandmama. Siempre sera un grande onor de rekordarlos Mme. i Mr. Perahya. Sus almas ke repozen en Ganeden.
