El enverano en la Isla Burgaz

El enverano en la Isla Burgaz

Burgaz es la tresera isla komo grandor entre las islas de Prens (Prens Adaları). Es redonda komo forma i su anchura es de dos kilometros.

Su nombre en grego es Antigoni.

‘Sait Faik Abasıyanık’ es un eskrivano famozo de la literatura turka ke bivyo en ‘BURGAZ’ un syerto tyempo de su vida. En todos sus kuentos (hikaye) eskrive sovre las kuatro islas, spesyalmente sovre Burgaz.

Su kaza agora es un muzeo enteresante ke munchos turistos vijitan.

El panorama de Burgaz es maraviyozo; de una parte la Isla de Kuchara (Kaşık Adası), de la otra Halki, ke es yamada Heybeliada, de la tresera parte las sharas de pinos (çam ormanları), los bodres de mar i las kazas de tavlas elegantes.

‘KALPAZANKAYA’ es un kafe restorante famozo entre las sharas, kon su panorama ande se puede ver el nasimyento i la puesta  (gün batımı) del sol.

Malorozamente oy ay muy pokos gregos en esta isla, todos se fueron a la Gresya.

Ma unos enamorozos (aşık) ke tyenen la nostaljiya de aki i no  vendyeron sus kazas vyenen a pasar el enverano. Aki, los djudyos son nombrozos.

En el anyo 2003, un dia de Kipur, un fuego muy grande kemo  munchos arvoles, kaji la meatad de las sharas en la isla  malorozamente.

Fue un dia inolvidavle para mozotros los djudyos ke estavamos  orasyonando en la Sinagoga de Burgaz.

Las Sefer-Toras en las manos de los mansevos, no supimos ande  guadrarlas para ke no se kemen.

Enfin, el Dyo Baruhu metyo su mano i el fuego se amato kon muncha  difikultad porke aviya un ayre loko.

En Burgaz ay vendedores de peshkados, solamente dos magazenes ke venden frutas i legumes, 5-6 bakkales, 15 arabas kon kavayos, 2 farmasias, un doktor solo en enverano, 6-7 restorantes en el bodre de mar, unos kuantos kafes, dos klubes ande las famiyas pueden entrar a la mar, un vendedor de agua buena, un kuafor, una vez a la semana ay un bazar ande se vende frutas, legumes naturales (doğal), un vendedor de djugetes…

Es komo un kazal chiko, ande todos se konosen, se saludan i se avlan.

Un lugar familyal ande todos los moradores estan en koryente de los sujetos ke se pasa de bueno u de negro entre las famiyas.

Fina el anyo 1953, no aviya meshkita. Despues se konstruizo una chika meshkita. Ay 4 eglisyas de los Ortodokses i Katolikes, i una Sinagoga chika.

La mas alta kolina (tepe) en Burgaz es “Bayrak Tepesi” ke es entornada de las sharas (orman) de pinos (çam).

Anteriormente (eskiden) el nombre de Burgaz era “Antigoni”. Mas despues se izo “Pyrgos” (Burgaz) ke kere dizir en grego “kastillo” (kale).

En 1928, se konstruizo en esta isla el “Sanatoryum de Burgaz” ke era uno de los mas vyejos sanatoryumes en Turkiya.

El primer ‘ZOO’ (hayvanat bahçesi) se konstruizo en Burgaz.

Burgaz es un paradiso, la mas kalma de las islas kon el aver limpyo, las flores, las personas i el entorno.

Ay munchos artistos (sanatçı) ke biven en invyerno i en enverano aki. Es una isla “Kozmopolit” ke kontyene todo modo de djente, rikos, povres, turkos, djudyos, gregos…

Se oye avlar, en turko, ladino, kurdo (kürt), fransez, ingles, alman,  ermeni i grego.

Lo ke es emportante en Burgaz; es la trankilitad i la relasyon del puevlo kon los animales (hayvanlar).

Kuando los barkos de los peshkadores arivan al bodre de mar, los gatos, perros, pasharos... se aunan para komer los peshkados. Es ermozo de ver este tablo. Es un sentimyento yeno de kerensya de bivir esta ermozura.

Burgaz es una isla ke transforma la persona a un esklavo ke bive kon muncha felisidad. Personas de diferentes kulturas i diferentes nationalidades biven aki todos endjuntos komo ermanos.

Vos kero kontar una istorya enteresante de Madam Marta ke dyo su nombre a un golfo chiko (küçük koy) konosido en la isla.

Madam Marta era una balerina konosida ke nasyo en Mersin en 1920. Era kristyana de orijen Egipsyana (Mısır). Eya entrava a la mar enverano i invyerno. Era una de las primeras balerinas de la Turkiya.

Se kazo i se enstalo en Burgaz en una kaza chika al bodre de la mar.

Eya pasava el tyempo en el golfo de Marta en nadando en la mar i en su kaza. Resiviya sus amigos i sus aliados (dost) en el entorno de la meza ke teniya debasho el arvole de igos (incir) ande teniya una meza syempre yena.

Eya se lavava invyerno komo enverano kon agua yelada i kaminava sin kalsas mizmo en la inyeve. Se muryo en el anyo 1986. Ayudava a todos i teniya relasyones kayentes kon los moradores en Burgaz.

Oy mizmo este lugar se nombra komo `Marta Koyu` para akodrarmos de Madam Marta, ke este en ganeden.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın