Korah

Despues del pasaje de los meragelim ke ya les kito Moshe Rabenu la esperansa de entrar a la tyerra bendicha, i ya les avizo la desizyon del Todo Poderozo ke todo el puevlo deven de murir en el dizyerto, se aflosho sus amistad kon el. I vinyeron asta pensar ke no kale sintir sus palavras ni ovedeser sus ordenes. I es en este tyempo ke se permete un syerto nombrado KORAH de la famiya de Levi, a salir a kontradizir a Moshe Rabenu.

Korah, toma kon el a Daton i Aviram, sus amigos de la famiya de Reuven i munchos personajes del resto del puevlo, i un syerto On, ijo de Pelet, i se azen una konpanya de 250 personas, todos grandes personajes de ombres afamados de entre el puevlo. Se paran kon altigeza delantre de Moshe i Aaron i toman a barajar kon Moshe Rabenu i azer abandonar todos sus ordenes.

Eyos toman a kontradizirle sovre 3 puntos muy emportantes. Prima: por lo ke nomino a su ermano Aaron por grande sirvidor del Kriyador (Koen Gadol) a el i a sus ijos. I defendyo ke ningun ajeno ke kera ke seya, puedra aserkarse asta esta ovra.

Segunda, por ke aparto el trivo de los Leviyim por sirvidores, del santuvaryo en lugar ke este sirvisyo apartenia asta entonses a los behorot, de kualunke trivo ke fuera. I tresera por lo ke se determino de dar la preferensya al trivo de Yeuda en lugar ke aparteniya a Reuven ke era el primero de los dodje trivos. Sigun el orden del Dyo, el trivo de Yeuda posava a delantre de todos los trivos en todas las oras. Sovre estos puntos i sovre el mal selo ke tuvo Korah ke el keriya ser el Koen Gadol se peleyan kon Moshe Rabenu por ke tyene ke senyorearse sovre el puevlo del Dyo i meter ordenes sigun su pareser.

Moshe Rabenu, entendyendo sus malos penseryos ke estan pensando ke todos estas ovras son echas a su pareser i no es por komando del Dyo alto, no tuvo el koraje de kontra dizirles akel momento por ke no se reboltaran mas negro. Les dize kon palavras tyernas ke aproven i ke agan manyana, el servisyo del ketoret ke es el saumeryo en el templo el i Aaron, i veran ken es el Santo ke El Kriyador eskojo en el, eyos o Aaron? Vyendo Moshe Rabenu ke estas tyernos palavras no izyeron ningun efeto sovre Korah i sus konpanyeros, enpeso a avlarles kon fortaleza, syendo ke sus penseryo no es mas ke por vinir kontra El Kriyador i mando a yamar Datan i Aviram ke estavan en sus tyendas por darles a entender sus yerro, puede ser se repyenteran. Ma eyos no kijeron sintir.

El Dyo Santo ordena a Moshe Rabenu ke se aparte de esta konpanya i les amostra en un momento una fuerte mortaldad en el puevlo.

Moshe Rabenu roga a El Kriyador a ke balde esta mortaldad, i ke abate su ravya.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın