Beaaloteha

La djente ajena ke estavan kon los ijos de Israel (EREV RAV) dezearon munchas kozas sin menester. Kozas ke no se puediyan topar mas ke en las sivdades povladas i no en el dizyerto. El puevlo de Israel sin apartar la diferensya ke ay de eyos a esta djente, i eyos yoraron dizyendo; “Ken nos dara a komer karne?”

I enpesaron a rekordar de munchas kozas de muy poka emportansa ke teniyan en Ayifto debaldes. Myentres ke el mantenimyento ke teniyan en la mano ke era magna era una koza muy estimada en su savor i en su vista, en su limpyeza, ke en tenyendo esto en la mano no kaliya pensar por unas kozas de muy poka emportansa.

El puevlo se rekojeron en la puerta de su tyenda, famiyas enteras a yorar por este mal ke les mankava todas estas kozas ke teniyan en Misrayim en abondansa. Este konporto de la djente le desplazyo muncho a El Kriyador, komo se olvidaron tan presto todos sus buendades. Moshe Rabenu se topa en un estado de pueder azer nada. El pensava ke la kulpa estava en el; ke no esta savyendo giyar a el puevlo. El se kesha kon El Todo Poderozo dizyendo: “Ke pekado tuve ke me dates esta karga tan pezgada a no pueder supotar. De onde tengo yo karne para dar a komer a esta suma de puevlo ke estan yorando dizyendo: “Damos karne!” Moshe Rabenu roga a El Kriyador ke si lo kere byen ke lo mate i no vera este mal ke no puede suportarlo.

El Kriyador le dize a Moshe Rabenu ke por endelantre no va tener el esta kantidad de yugo kon el puevlo. Le enkomendo ke eskoja 70 personas de los savyos de Israel ke son kompetentes de giyar a el puevlo.

El Kriyador les va dar la fuersa ke rijan a el puevlo i le van a dar alivyanar el yugo de Moshe Rabenu. Le diras a el puevlo le dize El Kriyador ke se apronten para manyana i komeran karne en abondansa. Tendran de komer fina un mez. Ma ke sepan ke esta karne les va salir de la nariz. I antes de eskapar de komerla van a murir munchos de entre eyos.

Moshe Rabenu vyendo ke esta dadiva de la karne va ser por el mal de puevlo, le roga al Kriyador de arepintirse de esto dizyendo una vez ke esta es unas vanedades del puevlo. Eyos keren topar unos pretekstos.

Moshe Rabenu rekonto a el puevlo ke El Kriyador ordena de eskojer 70 personas de los savyos del puevlo de los mas pertenesyentes de todas. Las aparo a el deredor del Mishkan. El Kriyador lo favorizo i pozo sovre eyos supofetiziya.

Entre las personas ke fueron eskojidas para esta misyon aviya dos personas nombrados Eldad i Medad ke los kualos restaron en real del puevlo i no fueron delantre del Mishkan komo las otras 70 personas. Estos dos personajes ke no les salyo el goral por esto restaron en el real i no fueron metidas delantre el Mishkan fueron profetizando. Moshe Rabenu fue avizado de parte su elevo Yeoshua ke estan profitezando en el real. El responde dizyendo; “Ken dyera ke todo el puevlo fueron profetas komo estas”.

El Kriyador izo arankar de la mar unas syertas aves nombradas Selav. Tanto era la muchidumbre ke se espandyo a el deredor de el real. El puevlo estuvo rekojendo dos diyas i una noche. Malorozamente ke este Selav fue por el mal del puevlo. Ainda tenyendo la karne en los dyentes mando El Kriyador una mortaldad. En el entervalo de un mez muryeron muncha djente del puevlo. Por esta razon se yamo este luguar KIVROT ATAAVA, tombas de el dezeo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın