Ke esta afitando en el mundo

Ay kuatro diyas de teniyamos los korasones en la boka, asperando kualo va afitar en las eleksyones de la prezidensia en Fransia. A la fin del primer tur vimos ke los kandidatos/tas klasikos de la derecha (sağ) komo de la siedra (sol) no fueron kapaches de tomar lugar entre los dos primeros rangos (sıra) i un ombre, Emmanuel Macron, ke es kazado kon una mujer mas aedada de vente i kuatro anyos de el – reelmente no es una koza muy komun (olağan); ke tiene trenta i mueve anyos i ke era un ministro de François Hollande, solo un anyo antes dio karar para ser kandidato para ser el prezidente del estado Fransez. I la segunda era Marine Le Pen, prezidente del partido Nasyonalisto ke es kontra la Union Evropea, kontra el Euro, kontra los estranjeros ke biven en Fransia, kontra los Islamistos i kontra todo modo de minoridades, partikolarmente kontra los musulmanos i los turkos. Komo so el ijo de una Franseza, tengo dos nasyonalidades i tengo el derecho de votar en las eleksyones fransezas. I diya de alhad me alevanti,  demanyana patranya i antes de irme el primer a merkar el livro de muestro amigo Viktor Apalaçi, ke eskrivyo sus rekuerdos sovre los 50 anyos ke bivio komo un djornalisto en el Festival de Cannes, me fui al Konsolato Fransez en Taksim para dar mi voto para Macron. No pensi muncho para esta desizion porke no era possivle para mi de dar mi voto para Marine le Pen. Ya esto seguro ke muestra patrona, Klara Perahya va eskrivir esta semana sovre este sujeto. Por esta razon no kero alargar mas mis ideas sovre este sujeto.

No estamos eskapondo de ir a dar votos por los referandumes o por siertas eleksyones. Diya de alhad vamos a votar para elijir el Hahambashi o puedemos dizir para darle muestra aprovasyon porke el Rav Izak Haleva va ser el uniko kandidato para las eleksyones de Hahambashi. Ke no vos pareska ke no kale ir para votar. Mizmo si ay un kandidato, devemos de ir a votar. Puedeser vos akodrash: anyos i panyos no teniyamos el derecho de elijir el Hahambashi. Ma oy en diya es mas demokratiko. Syete anyos antes vimos ke un Haham de orijin Turko ke bivia en Israel se izo kandidato. Oy en diya es la mizma koza i todos los raves ke sirvyeron para la Komunidad Djudia Turka pueden azersen kandidados. Los miembros del Bet-Din son otomatikamente kandidatos. Para no ser elijidos deven de travarsen de la kandidatura. I fue este modo.

La sola diferensya ke se aplika los katorze anyos dalkavo es ke el Hahambashi no es elijido por la vida entera ke va bivir. Es elijido por syete anyos. I kada syete anyos puede ser elijido sin limito. Las eleksyones toman lugar en kada sivdad ke biven los Djudios; mizmo ande no biven, komo Edirne ma azen todo modo de aktividades.

Diya de alhad, tenemos un garden parti kon el konserto de David De’Or, kontrtenor muy konosido en Israel i en el mundo. Ma el mizmo diya los Sirkedjilis van a vinir a vijitar el Kal de Edirne para selebrar la fiesta de Lag BaOmer. Reelmente va ser un diya yena de emosyon. Esto muy kontente de ver un grupo de mas de syen personas ke van a vinir para selebrar esta fiesta. Ya se ke en Israel asyenden fuegos (ateş) en las plajes i en los kampos. Mozotros vamos asender el fuego para las koftes, las sarsichas (sucuk) i los ligados (ciğer) - para ke sea kasher en primero los asamos en el mangal i dospues los friyimos (kızartmak). Kreo ke todos los ke van a vinir van a ser kontentes de komer estas todas karnes asadas i fritas antes de un konser ke va ser kreo muy reushido (inshalla!)

Avlimos sovre las eleksyones Fransezas, ma esto es el empesijo porke en kurto tiempo van a elijir los miembros de la Asamblée Nasional (Millet Meclisi) ke forma el grupo el mas emportante para desidar por todo modo de leyes. El segundo punto emportante es las eleksyones ke se van a realizar en la Alemanya. Savemos ke el estado Aleman es el payis el mas poderozo i el mas riko de la Evropa. Los rezultados de estas eleksyones van a ser un punto muy emportante para el avenir de la Evropa. Bivir i ver.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın