Yom Haatsmaut en Estanbol

Keridos meldadores, kada anyo komemoramos el Yom Hazikaron i selebramos el Yom Haatsmaut en el Neve Şalom. Este anyo el primer diya del mez de Mayo era la fiesta de los lavorantes en muestro payis i malorozamente los anyos dalkavo no es una fiesta ma un pleto entre el governo i las organizasyones de los lavorantes. Es un problem: ande se puede azer las manifestasyones! Es un otro problem kualo es permetido para las manifestasyones. Las organizasyones de los lavorantes keren organizar estas manifestasyones en Taksim ande anyos antes munchas personas fueron matados en una manifestasyon. I por komemorar las almas de los despedridos keren azer aya. I el governo no kere dar esta permisyon. Por esta razon kada anyo estamos bivyendo las mizmas difikultades el primer diya del mez de Mayo.

Los dirijentes de la komunidad kreo ke pensaron ke este anyo va ser mas kalmo i por esta razon organizaron la seremoniya en el Neve Şalom asta ke ayer la noche komo fue deklarado ke las kayes van a ser serradas en este diya i no vamos a pueder ir al Neve Şalom. I trokaron el lugar ande fue realizado la seremoniya. Estavamos en el Kal de Ortaköy. Ortaköy es un kuartier mas kalmo i mas leshos del sentro de la sivdad.

Ma komo muestros korelijionarios estavan yeno de emosyon, el templo no fue bastante ancho para toda esta djente. Siertas personas estan dizyendo ke estamos kada diya mas manko?

No se si es djusto. Ma estamos viendo ke los miembros de muestra komunidad estan frekuentando mas i mas el kal i estan partisipando mas ke antes a las aktividades komunales (cemaat faaliyetleri).

Noche de lunes fuimos resividos al kal por un grupo de mansevos ke reprezentavan siertas personalidades de la istoria del estado Djudio. La seremonia kon la minha i arvit turo mas de dos oras. La mas grande partida estuvieron muy kontentes de partisipar a una seremoniya asemejante. La seremoniya relijiosa fue enkavesada por los mansevos. Esto mos da una fuersa de ver los mansevos ke tienen la posibilidad de dirijar una seremoniya asemejante. El konsul Jeneral de Israel, el sinyor Shai Cohen, mos avlo sovre las relasyones entre Israel i la Turkiya i de lo ke se esta enfloresyendo dospues de la mueva pozisyon entre los dos estados. Savemos ke ay mas munchas relasyones kulturalas i turistikas. Ma el punto lo mas emportante es la enerjia ke va ser empleada en la Turkiya … Las Estreyikas d’Estanbol mos kantaron dos kantikas “Avinu Bashamayim i Beshuv Ashem”. Vimos un filmo de reportajes refletando syertos puntos de vista de los mansevos de muestra komunidad.

Dospues de las buenas relasyones entre estos dos payizes el Konsulato esta organizando un kokteyl el diyes de Mayo en el Hilton, en el mas grande salon. Kreo ke tienen entisyon de yamar muncha djente a esta resepsiyon para mostrar las buenas relasyones entre los dos payises.

Para eskapar mi artikolo ya se ke este anyo es la jubile de siertos evenimiyentos realizados en los anyos 1947, 1967;,1887 … i munchos otros… 

Ma el 2018 va ser mas emportante por ke el Estado Israelyano va fiestar sus ochenta anyos …  Munchos i buenos…

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın