Donald Trump i la Pared

Dospues ke Donald Trump fue elijido kon la minoridad del puevlo amerikano, el problema de la Pared salyo de muevo en medio. Los antisemistos van a dizir ke es un invento djudio porke en el venten siglo Israel, estado Djudio fue el primer para fraguar una pared entre Israel i la region Palestiniana. Todos avlaron ke fue una grande verguensa de separar la djente kon una pared. No se si tenian derecho o no ma kon estas paredes reusheron a evitar una grande partida de los atakos teroristikos. I no fue importante por eyos lo ke esta dizyendo el mundo entero.

  El anyo pasado, dospues ke la Turkiya bivyo un alay de problemas kon los imigrantes i kon los teroristos, desido de fraguar una pared entre la Siria i muestro pais. I empesaron a fraguarla. Kale saver ke la Turkiya tiene una frontyera de 877 kilometros. Reelmente kale achetar de kontrolar una frontyera de muevesyentos kilometros yeno de minas. No kale olvidar ke la Turkiya tyene otros 384 kilometros de frontyera kon el Irak ande tyene la okazyon de bivir otros kavzos.

  El problema de oy no es ni la frontyera Israelyana-Palestinyana ni la frontyera Turka-Siryana. La semana pasada la desizion del prezidente Trump fue el evenemento el mas importante de esta semana mizmo de este mez. Dio la desizion de fraguar una pared entre los Estados Unidos i el Meksiko porke la Amerika resive una grande kuantidad de Meksikanos ke alkansan al pais por kaminos ke no son konfirmos a las leyes de imigrasyon. Ma dospues de la desizyon de esta ley la grande partida de los Amerikanos se revoltaron kontra el muevo prezidente. Ya savemos ke una grande partida del puevlo Amerikano no reusheron a amar sus prezidentes. Mizmo pensan ke no es sus prezidente. I kale achetar ke los Estados Unidos es formado de imigrantes ke vienen de munchos paizes. En los anyos setenta kuando estava estudyante en la universitad para ser enjenyor sovre la elektronika mos rekomendavan de merkar siertos livros amerikanos. I nunka reushi a topar un livro ke fue eskrito por un amerikano. Eran Indianos, Chinesos, Koreanos i mizmo Turkos…

 De este egzempyo puedemos ver ke el avenir de los Estados Unidos depende i de los imigrantes. Porke estas personas lavoran kon mas muncha ambisyon para reushir. Porke reushir es muy emportante i este modo se kontan por benadam. El anyo pasado vimos un Turko ke es de un kazal chiko turko i ke sus paryentes no saven ni meldar ni eskrivir. I el reusho a ser profesor en medisina i lavoro toda su vida para reushir. Reelmente son mas pokos los amerikanos ke pueden lavorar komo estos. Kale achetar ke es la mizma koza en Fransia i en otros paizes. Los imigrantes azen munchos esforsos para tener moneda o un posto importante para ser respektado.

  I vimos ke dospues de esta desizion mizmo siertos djuzgadores dieron karar kontra esta ley. I vemos ke reelmente en los Estados Unidos mizmo el Prezidente no es kapache de pueder azer todo lo ke kere.

 

***********************

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın