Un anyo muevo es un presipyo ke kontyene todo modo de evenementos, mos da la kuryozidad, i la emosyon. Kada anyada mueva traye kon eya muevas esperansas, muevos atakos (atılım), muevas deskuvyertas (buluş), muevas reushidades i muevos adelantamyentos en todo modo de espasyo.
Kualo esperamos de la anyada 2017?
Lo mas emportante es la estabilitad (istikrar) en el pais.
Tenemos en el doredor konosidos, amigos, keridos, hazinos, personas ke estan luchando para bivir, personas de muestro entorno, mansevos ke se estan muryendo. Esto todo mos esta trayendo el pesimizmo, i estamos peryendo el guste i la gana de bivir.
Ser pesimisto amingua la motivasyon de la persona.
Mozotros devemos de ser realistos i pozitivos para pueder kontinuar muestra vida.
Personalmente penso ke devemos de konservar muestras esperansas para pueder luchar kon los problemas.
Ma, no kale desharmos, demoralizarmos, kale ke estemos muy fuertes para pueder rezistir a las difikultades. Porke la vida es una lucha (mücadele) kontinualamente, sin tomar reflo.
La persona es apta a ansyearse (kaygılanmak) por kualker koza. Mos estamos ansyeando por el avenir de muestra famiya, ijos, ijas, padres, madres, el entorno, muestros keridos, amigos, aliados (dost)...
En el dor ke estamos bivyendo, la vida esta muy difisil para todos en el mundo entero. El dor troko, la teknolojiya muy avansada mato la valor de muestras kostumbres (adet).
En el estado ke mos topamos, en las kuatro partes del mundo, puedemos pensar ke la anyada 2017 va kontinuar kon todos los puntos negativos; komo la kriza ekonomika por egzempyo, las gerras, los tremblemyentos, los aksidentes, el terorizmo i munchas otras kozas, i nada no va trokar.
Devemos de ser optimistos, illuzyonarmos (hayal kurmak),
i pensar ke esta illuzyon va ser verdad; tener esta esperansa, lavorar i luchar es la mijor koza, para pueder liberarmos de este pesimizmo.
No kale pedrer esta esperansa mizmo en los momentos los mas difisiles i areskuros. Porke esperar, es kreyer ke va naser un diya muevo, ermozo despues de todas las amarguras, de todas las penas.
No se puede bivir sin esperar.
Esto ogurando ke el anyo 2017 mos trayga la sanedad, la reushitad, la alegriya, la unyon, la amistad i la pas entre todos kon la felisitad en muestras famiyas i en el mundo entero.
ŞALOM es el jurnal ke sale una vez a la semana en Estambol, kon sus suplementos El Amaneser, las revistas (dergi) ŞalomİST i ŞALOM Dergi; suplementos muy enteresantes en el punto de vista del kontenido (içerik), ande lavoran diversos profesyonales kon volontaryos i volontaryas.
ŞALOM es una grande famiya, de mansevos, mansevas i de personas de todo modo de edad ke dan un grande apoyo i se arekojen kada semana para kitar este uniko jurnal de los djudyos de la Turkiya, kon muncho devuamyento, lavoro i sakrifisyo.
La semana ultima, esta grande famiya se arekojyo en el Bosfor para pasar una nochada todos endjuntos, komer, bever, riyir i resivir el anyo 2017 kon entuzyazmo (coşku).
Fue una nochada muy reushida, siguramente kon el presidente İvo Molinas, ombre de grande valor ke izo una avla espesyal en remersyando el lavoro i la solidaridad de todos los partisipantes. La koordinatrisa de publikasyon (yayın koordinatörü), Virna Gümüşgerdan, kon su ekipa, lavoraron muncho para organizar esta nochada maraviyoza ke tuvo 85 partisipantes. Todos estavan muy intimos i kayentes los unos kon los otros. Los ke no se konosiyan tuvyeron la okazyon de konosersen en diskutyendo en sujetos diferentes.
La orkestra kon la kantadera fue una sorpreza (sürpriz) para todos. Estas okazyones son emportantes para reunisarmos, i ser syempre aunados.
Lo mas emportante fue ke los mansevos de 20 anyos kon los aedados de mas ariva de 50 anyos avlaron, kantaron i baylaron todos endjuntos komo una famiya.
Esto remersyando en primero el presidente kon todos los dirijentes del Şalom, de tener la idea de envitarmos para enrezyar las relasyones entre mozotros.
Ke el anyo 2017 mos trayga la pas en el mundo entero sin terorizmo; la sanedad i la fertilidad (bereket) en todo modo de espasyo para pueder bivir sin sar i sin mal. Amen ve Amen.
