Vayigash

Los ermanos de Binyamin, i partikularmente Yeuda, el garante de su padre, no se van a kontentar tan presto. Kon esta grasya del podestador del Ejipto enpesan alora amostrar sus valor, i sus baraganiya i Yeuda sovre todo se mete a konvenser kon Yosef kon buenas i kon malas i le da a entender ke kale ke se yeve sano a Binyamin onde su padre.

Alora se konvensyo byen Yosef ke sus ermanos verdadmente se van a entregar a la muerte por uno de eyos. I ke esto demostra por siguro ke ya se tuvyeron repintido de lo ke izyeron kon el. I no puedyendo mas suportar se dyo a konoser a sus ermanos, kon muncha fineza i se abrasaron i yoraron de parte a parte.

Al punto tuvo Paro avizo de esto i los grandes del palasyo i se gustaron muncho de saver ke sus podestador i rijidor es de una famiya la mas onorada del mundo. I no es un ombre perdido o esklavo sigun pensavan fin agora.

Yosef les dyo regalos i dadives a todos sus ermanos para todo la famiya. I kon orden de Paro mando a sus ermanos kon karosas del palasyo onde Yaakov su padre por azerlo vinir a Mistrayim, para ke biva el resto de sus diyas kon repozo alado de su ijo kerido.

Los ermanos de Yosef no perdieron tyempo i se fueron todos a una yenos de alegriya i gozo onde Yaakov sus padre i sigun les enkomendo Yosef se rijeron de no darle avizo a Yaakov al punto del echo de Yosef.

Yaakov no kijo kreer tan presto sus palavras ni la palavras de sus ijos.

Pero, vyendo las karosas i los regalos ke le mando su ijo, se konvensyo por siguro ke es verdad lo ke dizen i se arebivyo su korason i kavro fuersa i alegriya todos los moradores de Kenaan ke savian la ansya de Yaakov se alegraron de sintir esta buena nuvela. I les izo konbite tres diyas.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın