Las relasyones turko-israelyana kon los muevos ambasadores

Ya se ke la fin del anyo i el empesijo del muevo anyo no sinyifika koza grande para los djudios ke emplean el kalendaryo ebraiko para pratikar sus relijiones. Ma para los ke no biven en Israel, el kalendaryo kristiyano tiene mas muncha valor en la vida non-relijioza.

Si keresh de punto de vista ebraika, si keresh de punto de vista kristiyana pasimos una anyada no muy famoza. En muestro payis en Turkiya tuvimos munchos evenimientos teroristos i munchos otros kavzos para kitar la djente de su repozo. Es djusto ke puedesh ver munchas personas en los restoranes, en los bares i en munchos lugares ande se puede englenear. Esto no kere dizir ke estan en alegriya. Ma komo no saven kualo azer en estos diyas se estan mizmo engleneando.

Verso la fin de este anyo kreo ke el evenimiyento el mas orozo ke bivimos mozotros djudios turkanos fue la nominasyon de los dos ambasadores: el turko en Tel Aviv i el israelyano en Ankara. Serka de los trenta anyos dalkavo tuve la posibilidad de konoser todos los ambasadores de las dos partes. I kreo ke por la primera ves dospues de una perioda no muy klara ke tenemos dos personajes en primero muy mediatikos, i kreo ke son muy kapaches de punto de vista diplomatika. Tuve el plazer de konoser el ambasador Turko, Kemal Ökem, unos kuantos diyas antes ke empese su mision en un desayuno (kahvaltı) en el Museo Djudio de Estanbol. Reelmente me plazio muncho kon sus ideas, kon su modo de komportamiento. Esto seguro ke el va reushir en su mision. Reelmente kale achetar ke el ambasador turko tiene mas munchas posibilidades para reushir porke los djudios turkanos ke biven en Israel son prontos para azer todo modo de esforsos. Mizmo ke se inyervaron dospues de los evenimientos de “Mavi Marmara” i de “One minute”, dainda tienen el korason kon la Turkiya. Dospues de tantos evenimientos kreo ke se van a komportar mas resonavlamente i manko sentimalmente...

Ya savesh puedeser ke egziste un Serail en Yafo ke puede ser empleado por la mision diplomatika turka i unos kuantos anyos antes teniamos siertos projektos. En esta epoka el Prezidente de la Republika Turka, Abdullah Gul estava pronto para ser prezente en la avyertura del “Serail” ande se puediya organizar munchas aktividades konsernando la kultura turka mizmo la kultura djudia - turka. Ma malorozamente no se realizo. Oy puedeser es el diya de estas aktivitades, Todo los ke biven en esta rejion deven de saver ke las relasyones Turka - israelyana puede tener un nivel mas alto i es lo ke dezeamos.

Malorozamente no konosi dainda el ambasador Eitan Naeh. Izo una vijita al Gran Rabinato ma no tuve la posibilidad de partisipar. Ma vimos ke dospues de su letra de konfiensa prezentada al Prezidente de la Republika, organizo en su rezidensia una envitation ke fue reushida. Lo meldimos en las gazetas.  Mizmo antes de konoserlo supimos ke es Fenerbahçeli, ke tomo mision en Ankara anyos antes, ke konose la Turkiya i ke konose mizmo el turko.

Kreo ke estas relasyones van a enfloreser kon los esforsos de estos dos ambasadores.

Bivir i ver.

 

*************

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın