“El Get” antes del divorsyo

 

En Turkiya tenemos un Gran Rabino “Hahambaşı” ke es reelmente feministo i defende los derechos de las mujeres en observando la Halaha. La semana pasada durante un reportaje ke se realizava kon el prezidente de muestra Komunidad, tomo la palavra para defender los derechos de las mujeres. En muestro pais komo todos los paizes de la Diaspora tenemos kazamyentos mikstos (djudios/djudias kon mujer/marido ke no son djudios) i vemos ke la mas grande partida se realiza en los segundos kazamyentos (ombre/mujer kito/kita ke se kaza por la segunda vez). La mas grande majorita son los ombres kitos ke se kazan kon mujeres muzulmanas. Kualo es el problema?  El problema es ke kuando dan karar de kitarsen avlan kon un avokato i se kitan ofisialmente. No pensan lo ke va afitar dospues. El ombre es libero. Puede azer lo ke kere. Ma su mujer divorsada no tiene la posibilidad de kazarse kon un djudio. I si keren azer una kreatura es un problem sosyal ke enteresa muestra sosyedad.

I muestro Gran Rabino, el Rav Haleva, konseja a las personas ke dieron karar de divorsarsen en primero  de ir al Gran Rabinato i divorsarsen relijiozamente. Anyos antes el dover de los rabinos i del Bet-Din era de konvenser la mujer i el marido para ke no divorsen i ke aproven un sierto tiempo para la felisidad de las kriaturas. A la fin vieron ke no ay hayre, a lo manko salvaremos el avenir (gelecek) de las mujeres. I dospues ir al tribunal para divorsarsen ofisialmente. Este modo dingunos van a tener un problema si keren kazarsen una segunda, mizmo tresera vez. Uno de los mas grandes problemas es si no se topa el marido para ke de “Get” a su mujer. Bivimos munchos kavzos ande el marido selozo de su mujer no le kijo dar “Get” porke no keria divorsarse. O vimos siertos ombres ke se pyedreron – uno ke se fue a la Rusia i no torno kinze anyos i no dyo haber ande estava (no vos esto avlando del dizimueven siglo, este es un kavzo ke se realizo en el ventiunien siklo. Estos diyas ay una mujer ke kere su “Get” porke su marido se echo del Ponte del Bosphor i su kadavre no fue topado. Komo ay un dubyo si el marido bive dainda es un problema muy importante para los rabinos i para la mujer del sinyor ande no savemos si reelmente se suisido o se fuyo (porke de vez en kuando dingunos lo ven echandose por el ponte).

I vemos mizmo en este siglo ke se puede bivir kozas asemejantes, ke reelmente no es muy fasil de ver i de bivir las konsekuensas.

Un otro problema importante ke bivimos en muestra komunidad es los ijikos i ijikas nasidos de padre djudio i de madre ke no es djudia. Kualo devemos de azer para estas kriaturas? Este sujeto se va tratar en un otro artikolo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın