De Detras Las Fyestas…

De Detras Las Fyestas…

El anyo 2016 no fue tan agradavle para mi i para mi famiya. Malorosamente en el empisijo del anyo peryi a mi kerida madre, el platano (çınar) de muestra famiya.  

Mi madre Zelda NATAN era una persona muy kultivada,  spiritual, kerensyoza, devuada, alegre, pozitiva, vizyonarya (vizyon sahibi), una mujer agradavle (hoş) de grande valor. “Ke su alma repoze en ganeden...”

Antes doz mezes fue la pedritad de la luz de mi vida “z.l.” mi marido Meir GAON; una persona sensivle, sensero, onesto, derecho, korekto, intimo, modesto, savido, kudyozo, amable,  humanisto, un muy buen marido, buen padre, persona ke dava grande emportansa al amigable, sezudo (aklı-selim) i munchas otras valores…

Fui aharvada de estas dos peryitades; las personas las mas emportantes de mi vida. Por esta razon; desidi de iyirme a Israel ande mis keridas primas por pasar las fyestas; Rosh-Ashana i Kipur en la tyerra santa. Mizmo ke pensi a mi ija, ijo, ermano, tiyo de no desharlos solos, i va ser muy pezgado para mi de arekojer la famiya sin el balabay de kaza mi kerido marido…

Mis primas kon sus maridos me arisivyeron muy kalorosamente, komo una prensesa. La noche de Rosh-Ashana fuimos 18 personas en la meza reboltoneyoza.

Un anyo muevo, Rosh-Hashana es un presipyo (başlangıç) ke kontyene todo modo de evenementos, mos da la kuryozidad, la emosyon, para ser pozitivos i realistos por el anyo vinidero.

Lo mas emportante es la estabilidad (istikrar) en todo modo de punta de vista en el pais. Mizmo ke es difisil; kale konservar la esperansa.

Personalmente penso ke; las personas deven de konservar sus esperansas; para pueder kontinuar a bivir, para pueder luchar kon las problemas.

Mizmo si estamos muy pesimistos, para pueder depasar este estado; kale ke konservemos muestra aftaha (ümit).

Tenemos en el doredor; konosidos, amigos, keridos, mansevos hazinos, personas ke estan luchando para un bokado de komer, para bivir, personas de muestro entorno, de muestras famiyas, mansevos ke se estan muryendo. Esto todo mos esta trayendo el pesimismo, i estamos peryendo el guste, la gana de bivir.

Ma, no kale decharmos i demoralizarmos; kale estar muy fuerte para pueder rezistir a las difikultades. Porke la vida es una lucha (mücadele) permanente (sürekli), sin tomar reflo kon todos los evenementos negativos ke akontesen unos de detras de otros.

Delantre de unos kavzos puedemos kedar irremediavle (çaresiz) i mos puedemos demandar, u mos puedemos revoltar en dizyendo, “Deke las personas Buenas se estan iyindo, i los Negros estan kedando?...”

El destino!... ke no se puede trokar…

Rosh-Ashana orijinalmente es la perioda ke las personas deven de echar ojo a los yerros, a las kulpas ke izyeron entre el anyo i deven de ekskuzarsen delantre del todo el Puederozo…

Es una de las fyestas las mas alegres ande djuzgamos el anyo ke paso i fyestamos la kreasyon del mundo kon dezeos (dilek) pozitivos ke oguramos de aryento del korason.

Yom Kipur es el dia el mas sakro para los djudyos: El dia de arrepentimyento (tövbe).

Despues de las orasyones ke surreyan dia entero i las ekskuzas, las personas se syenten purifikados (arınmış) a la fin del dia.

Sukot es la fyesta ke sureya ocho dias kon alegriya, en las sukas, komyendo, bevyendo i risivyendo a los musafires… En estos dias arrogamos al Dyo por la azlaha i la abondansa en los echos, en las kazas…

‘Oşana Raba’ se fyesta en el syeten dia de Sukot ke es el dia de alkavo. Oşana Raba es el dia de las desizyones del djuzgo Divino (ilahi yargı) ke se estampian (mühürlenmek).

Todas las personas en el mundo, sont djuzgados (yargılanır) en Rosh Hashana.

El mueven dia despues Sukot es una fyesta diferente Simhat Tora ke se va fyest ar este anyo el 24.10 lunes la noche en todas las sinagogas kon grande alegria.

Vamos a ogurar esperansas pozitivas, sanedad, kalmo i pas en todo el mundo i felisitad.

El Dyo ke mos ayege para kada anyo kon todos djustos. Pujados i non aminguados. Amen ve amen…

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın