Anyada Buena

Deviya de eskrivir este artikolo kon este titolo la semana pasada. Ma komo esto muy okupado i no se komo devo de alkansar a todo lo ke puedo azer de vez en kuando ago yerros o no alkanso a lo ke devo de azer. La komunidad djudia de muestro pais pasa dias muy enkargados antes del muevo anyo ebraiko: Rosh Ashana. Deven de embiyar regalos o kartas de las ovras de bienfezensia a sus parientes, a sus amigos i mizmo a sus konosidos para ogurarlos una buena anyada. Dainda la mas grande partida de los djudios turkanos se arekojen kon sus famiyas para selebrar la anyada mueva. I este akto da un kargo emportante a las dammas mizmo si tienen personas en kaza ke les ayudan. La mas grande partida preferan de gizar sus komidas de fiesta.  Mizmo si no semos muy ortodoksos miramos dainda a las tradisyones relijiozas. Este anyo preferi de embiyar los livrikos en judeo-espanyol a mis pariyentes i amigos en lugar de embiyar kartas (de muevo embiyimos kartas o livros del Şalom para los ke no meldan el judeo-espanyol). Ya savesh ke el Sentro Sefardi de Estambol publiko sesh romansos o romansikos en judeo-espanyol. “El Amor de Antonio por su mujer”, “La Ermoza Janeta entre dos amantes”, “El amor de Matilda kon dos jovenes”, “La ija del Bankiero”, “La mujer pasensyoza”, “La ija del Kazalino i Anriko” son los sesh primeros livros. No se si les izo plazer ma para los ke pueden meldar esta lingua es reelmente un regalo maraviyozo porke tenesh la posibilidad de meldar un livro en un viyaje de vapor o motor para ir a la Ada. I reelmente este enverano los meldi en el bus de mar (deniz otobüsü). No vos merrikiesh, puedesh meldar un livro de kinze ojas en una ida (gidiş) a la Ada.

La semana pasada uno de los mas importantes evenimientos en el Mundo Djudio era la muerte i los funerayes (cenaze töreni) del mueven prezidente de la Republika Israelyana el sinyor “Shalom” (aki Peace - Barış) Shimon Peres. Malgrado ke era uno de los fondadores del estado djudio, era puedeser el dalkavo ke pensava solo en la paz entre el estado Israelyano i sus vizinos arabos o palestinianos. Kon su fondasyon ayudava a los Palestianos i pensava ke la paz se puede realizar kuando los Palestinianos van a tener un nivel ekonomiko mas alto. Ambargos nunka no fue su buto para realizar PAZ kon los Palestinianos. Es el ke kijo realizar un ospital, mizmo una uıniversidad entre Israel i Gazza. Mizmo la Turkiya devia de ser partisipante en este projekto. Ma dospues de la gerra kon los Palestinianos en Gazza este projekto no fue realizado.  Tuve la okazion de vijitarlo (kuando era prezidente de la Komunidad Djudia de Turkiya)  unas kuantas vezes kuando era Prezidente del estado Israelyano. Mizmo la mas grande onor era su vijita a la Turkiya i a la Sinagoga de Neve Shalom. Su vijita a la kapitala de muestro paiz i al Parlamento Turko fue un evenimiento. Tuve la posibilidad de sintir su diskorso en el TOBB (Türkiye Odalar ve Borsalar Birliği) ke es la mas grande asosyasyon ekonomika de la Turkia. Dospues ke vijito Ankara lo resivimos en el Templo de Neve Şalom i komo era el prezidente de la Komunidad Djudia Turka tuve la onor de resivirlo en la entrada del Neve Şalom. El Sinyor Jak Kamhi ke lo resivio dospues a su kaza se topava en esta seremonia. El diskorso fue apresiado i aplodisado por los miembros de muestra komunidad. El prezidente anyos enteros malorozamente no fue elijido en las eleksyones ma en kada reunion fue resivido komo un eroe (kahraman).

Oy djueves devo de irme al Konsolato Israelyano para eskrivir mis sentimientos en el livro de memoria ke se topa en el Konsulato Israelyano. I tres diyas estava yeno de emosyon, komo deviya de empesar mis biervos, komo devo de  adresarme al Sinyor Prezidente i komo devo eksprimir mis sentimientos i mi tristeza. Ke su alma repoze en Ganeden.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın