Deskripsyon Djudia en el djugo de solombra “Karagöz”

Ya savemos ke en el folklor de la Kultura Otomana-Turka konosemos de serka el Hodja ke es Djoha en el folklor sefardi. Los interesados konosen ke estas istoryas egzisten en munchos paizes ma tienen nombres diferentes. Se dize ke egziste las mizmas istorias en Sicilia ma los nombres de las personas son diferentes.

Es la mizma koza para los djugos de solombra ke fueron kreados en primero en la China, i dospues en la India. Ma se save ke el djugo de “Karagöz” vino al Imperio Otomano dospues de la invazyon de la armada Otomano al Ejipto. I los primeros djugos fueron djugadas en shena en el 16en siglo.

Oy en dia, en munchos payizes, en los djugos de solombra imitan los djugos ke tenemos en el “Karagöz” Otomano-Turko. Malorozamente en muestro pais no estan dando la importansa nesesarya por este djugo istoriko. Es solo en la fiesta de “Ramadan” ke durante las nochadas se djuga en siertos lugares.

Si vos enteresash en este djugo vash a ver ke en munchas piyesas se topan deskripsyones djudias. Ay unos kuantos anyos ke esto lavorando en este kampo i lavori kon los artistos ke azen estas deskripsyones kon kueros de gameyos o de vakas  i se emplean tinturas ke son muy espesyal. Kale saver ke ay solo unos kuantos artistos en Turkiya ke azen estas deskripsyones.

Reelmente es muy kuryozo de ver el djudio en munchas piesas. Deke preferaron este karakter? Kreo ke en esta epoka el djudio kon su konversasyon un poko charpeada era muy karikaturistiko. Tenia la manya de ser eskaso i azia pazarlik en kada okazyon. En la mizma epoka avia diez vezes mas de Ermenis, Gregos i otras minoridades relijiozas o nasyonalistas. Ma kuando djugavan estos djugos preferavan karakteres Djudios.

Agora tengo una koleksiyon de las deskripsyones djudias ke son echas ensima de kueros de gameyo i esto aparejando una ekspozisyon sovre esto sujeto.

Munchos amigos me van a demandar deke pasi mi tiempo kon esta ekspozisyon ande para munchos, arebashan el djudio. Mi opinion es ke esta afirmasyon tiene fachas derechas. Ma todo lo ke egziste en estos djugos no son este modo. I el karakter “Djudio” de este folklor deve de ser mensyonado (sözü edilmiş). Si uno ke no es djudio azia este lavoro kreo ke del primer dia seria estampado (damgalanmış) komo “antesemito”. I esto siguro ke dingunos van pensar de esta manera sovre mi.

Espero ke va konkluir este lavoro en poko tiempo i reelmente va ser apresiado. Komo so una persona kon emosyon, amostri unas kuantas deskripsyones a los diridjentes de muestra komunidad i reelmente se emosyonaron i una partida de estas deskripsyones toman lugar en las paredes del edifisio del Rabinato. Mizmo los modeles mas chikos se venden en la botika del muzeo Djudio ke se topa en la Sinagoga de Neve Shalom.

Espero de anunsiarvos esta ekspozisyon antes del enverano...

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın