Miniks – La segunda mestra en muestra sivdad

Silvyo OVADYA Köşe Yazısı
7 Eylül 2016 Çarşamba

Kuando estash invitado a siertos lugares ke son los privado de siertas personas o famiyas no tenesh el derecho de eskrivir lo ke bivitesh en estas nochadas o mo-mentos. Va ser la mizma koza para el weekend maraviyozo ke pasi en la isla Miko-nos en Gresia. Estava invitado para el divertimiyento de una boda del ijo de mis amigos keridos.

Ma oy vos puedo avlar de la mestra (yuva) Miniks ke se topa en la parte asiatika de muestra sivdad. Anyos antes kuando era prezidente de la komunidad pensi ke reelmente deviamos de avrir una mestra en la parte asiatika de muestra sivdad porke un tierso de muestra komunidad bivia i bive en esta parte de la sivdad. I kale akseptar ke esta populasyon es mas atada a su komunidad. Avlimos munchas vezes kon los parientes de estas kriaturas ke puedian ser elevos de la mueva mes-tra. Todos enteresados; mos prometyeron ke van a dar sus kriaturas, sus rikeza de sus vidas a la mueva mestra. Merkimos mizmo un panel van para el transporto de estas kriaturas. Ma malorozamente empesimos kon kuatro elevos i tuvimos prob-lemas mas de un anyo i medio. Reushimos a obtener la permision del Ministeryo de la Edukasyon para avrir una mueva mestra kon el nombre de la eskola ke tenemos en Ulus. Todos disheron ke no era posible de pueder avrir una mueva mestra – mizmo si es departamento/sukursal (şube) de la eskola prinsipal. Ma reushimos kon la Sinyora Avokata Ester Zonana de resivir esta permision. No fue muy fasil… Mos kitaron un alay de hohentas ma a la fin mos dieron esta permision.

Ya se ke es muy difisil de avrir una mestra ande solo los djudios pueden ir. Dospues de unos kuantos anyos reelmente fue muy difisil de kontinuar. Es el prezidente de la komunidad de Haydarpaşa-Caddebostan, el Sinyor Mayir Saranga i yo ke insisti-mos para ke esta eskola no tope fin. El vise prezidente de esta epoka (el prezidente de muestra komunidad el Sinyor Ibrahimzadeh) despues de siertas sedutas desidi-eron ke la eskola  sea enkavesada por la komunidad de Haydarpaşa – Caddebostan. I kon la modestia de estos diridjentes reusheron a tener un koste (maliyet) mas re-zonable para sus aktividades. Oy en una reunyon ande se topan los lideres de muestra komunidad mos dieron una prezentasion ande kon grande plazer mos ambezimos ke el anyo pasado tenian mas de sesenta kriaturas en esta eskola. Kero rengrasyar la direktrisa de esta eskola la sinyora Doli Levi ke aze su echo de kora-son kon todas las maestras (öğretmen) ke son ekspertas en sus echos.

I tuvimos la posibilidad de oyer el modo de edukasyon ke s’esta dando en esta mestra “Miniks”. Reelmente kale dar apoyo a estas personas porke estan aziendo un echo maraviyozo. I kale dizir ke siertas personas ke no tienen posibilidades de pagar resiven el ayudo de la komunidad. Los ke no tienen mas la responsabilidad de pagar la eskola de sus ijas i ijos, i si tienen la posibilidad de ayudar pueden dar un dono a la Komunidad de Caddebostan.

Mi opinion es ke deven de formar kuatro klasas ke van a ser la eskola primera i este modo todos los ke moran en la partida asiatika van a tener la posibilidad de ir a una eskola Djudia. Espero ke esto se puede realizar en poko tiempo.