Ree

Mira yo vos esta dando a vozotros oy la bendisyon a kondisyon ke vash a ovedeser las enkomendansas de el Kriyador. En la Tora egziste 613 enkomendansas, las 55 de las kualas estan eskritas en la perasha Ree. Unas kuantas de las enkomendansas ke meldamos en la perasha de esta semana son: De alesharmos de la idolatriya. Las kozas ke son defendidas de komer. Los doveres ke tenemos verso las personas. La enkomendansa de ayudar a los meneterozos. Ansi la meldamos en la perasha, “kuando uvyera en ti menesterozo de alguno de tus ermanos, en alguna de tus sivdades, no endureskas tu korason, ni serres tu mano a tu ermano menesterozo si no ke avrir avriras tu mano a el, i enprestar le enprestaras lo ke le abasta, lo ke tyene de menester. Solamente si eskuchar eskucharas a la boz de el Kriyador tu Dyo para guadrar, para azer todas estas enkomendansas ke yo te enkomendo oy porke el kriyador te bendizera komo te avlo. La Tora nos avla tambien en esta perasha por las tres fyestas ke son yamadas ‘Shalosh Regalim’: Pesah, Shavuot i Sukot. Ke estas tres fyestas son enkomendansas ke devemos realizar verso el Kriyador. Tambien en estas fyestas devemos de alegrarmos nozotros, nuestros ijos i nuestras ijas i azer alegrar a el Levi ke syerve en el santuvaryo, a el peligrino, a el guerfano, i a la bivda ke estan bivyendo kon ti i te akodraras ke fuites syervo en Ejipto, i guadraras i aras estas enkomendansas.

Ya es savido lo ke es eskrito en la gemara ‘Şabat’. El idolatro ke vino a konvertirse onde ilel azaken, ansi le dize: Lo ke no te plaze ke te agan a ti, tu no la agas a ninguno. Esto es la Tora entera. Agora puedes enbezarte la Tora entera. Estas palavras nos enbezan: Toda persona ke onora, visto ke somos todos kriyados de parte de el Kriyador, onora i al Kriyador, porke es muestro Sinyor, i nuestro Kriyador

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın