Mase

Estos son las movidas de los ijos de İsrael ke salyeron de la tyera de Ayifto por mano de Moshe i Aaron. I Moshe eskrivyo sus salidas sigun sus movidas por dicho de Dyos.

Moshe Rabenu sovre el orden Del Kriyador eskrivyo los nombres de kuarenta i dos luguares ke pasaron los ijos de Israel en el dizyerto. El eskopo de mansyonar las nombres de estos luguares fue, por ke sepan las jenerasyones vinederas las maraviyas ke izo El Kriyador a nuestros padres en la kuarenta anyos ke estuvyeron en el dizyerto. Komo eskrive en La Tora: “El Kriyador no te afriyo te arto, te izo komer pan, tu vistido no se envyejesyo de sovre ti”.

En el Midrash Tanhuma dize: “I una razon ke kanta en la perasha de Mase estos kuarenta i dos luguares ke estuvo el puevlo Djudyo es, por dar merito a estos luguares ke abrigaron a los ijos de Israel”. I la leson ke se puede kitar de este pasaje es un dizyerto ke abrigo a la cente tuvo merito de Dyos, si una persona abriga i arta a los menesterozos no kere dicho ke grande merito tyene verso El Kriyador.

Los nombres de los luguares ke pasaron los İjos de İsrael fueron dados sigun los pasajes ke afitaron ayi ‘Kivrot ataava’ el luguar onde enteraron sus dezeos, ‘Mara’, onde bevyeron aguas amargas i se las adulso El Kriyador mezo Moshe Rabenu.

Dishites a tu granpapa ke estudijimos asta la manyana. Le responde dizyendo; “On de puediamos topar la okazyon de sintir este valutozo kastigeryo. Ansi los trivos ke no kijeron entrar a la tyera de Kenaan no respondyeron a Moshe Rabenu i sintyeron el buen doktrina. Komo dize Shelomo Ameleh en el livro de Mishle. “Ombre savyo estima el doktrino”.

Matot- Mase

Los trivos de Reuven i Gad teniyan muncho ganado, ovejas i kuatropeas. Se les aziya menester unos luguares de buen pasto, i unos tyeras visyozas por pasear sus ganado. Vyendo estas provensyas ke tomaron de el Emor, i de el Bashan eran unas tyeras muy visyosas se permetyeron i fueron los grandes de estos trivos Reuven, Gad i medyo trivo de Menashe, onde Moshe i Elazar los grandes de el puevlo i rogaran a Moshe Rabenu si sera posivle ke les dyera estas tyeras a eyos por sus parte de erensya en la tyera permetida. I ke no los izyera pasar a eyos a la frontyere por la otra parte de el Yarden.

La demanda de esta cente no era una demanda afuera la razon todo el puevlo tambien no estavan deskontentes de esta propozisyon por ke a la verdad la otra parte de el Yarden es muncho mas mijor ke este luguar onde keriyan tomar sus erensyas los dichos trivos. I es solamente a eyos ke teniyan munchas kuatropeas ke les valiya mijor este luguar.

Ma por tanto Moshe Rabenu se aravya kon eyos por lo ke tuvyeron la ozadiya de dizir ke no las aga pasar el Yarden, i les dize: “Vuestros ermanos ke vayan a gerear kon sus inimigos i vozotros keresh estar aki en vuestro repozo, ya vos olvidates el mal grande ke kavzaron vuestros padres kuando los mandi a el Kuskar la tyera ke eyos izyeron deskorajar los korasones de el puevlo, i fueron kavzantes a ke muryeran todos en el dizyerto. I ke estuvyeresh rodeando 40 anyos. I agora vos permetiles vozotros de asemejar a vuestros padres.

Los dichos, Reuven, Gad i medyo trivo de Menashe les dizen a Moshe Rabenu ke sus eskopo de tomar estas luguares no es por no tener koraje de pasarla frontyera i gereyar lado kon lado kon sus ermanos. Kuando vana okupar la tyera i vana morar kada trivo en la tyera de Kenaan eyos vana tornar a sus tyerras.

Alora les dize Moshe Rabenu si verdadmente vozotros vaja azer esto ke estash dizyendo. Alora seresh limpyas kon el Dyo i kon la cente.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın